ازاي اكسب فلوس من النت؟
لو من مصر أو اي دولة عربية وعايز تكسب فلوس اون لاين فيه طرق سهلة وصعبة تقدر انك تجيب منها اي حاجة.
معلومة ع السريع…
اكتر عدد ناس في الدول العربية بتشتغل اون لاين وبيجيبوا فلوس كويسة من النت من مصر؟؟!!!
لكن…
علي الرغم من ده فطريقنا في الشغل أون لاين اصعب بكتيير من دول الخليج مثلا وده لسببين:
- احنا كمصريين مش بنحب نخاطر ونستثمر فلوس علي النت.
- معظم الطرق البسيطة الممكن تجمع منها رأس مال كويس في دول الخليج مش متاحة في مصر.
طيب نرجع تاني لسؤالنا ازاي نعمل فلوس اونلاين؟ سواء في دول الخليج او مصر؟
ازاي اكسب فلوس من النت؟
لازم تحدد في البداية الطرق المناسبة والطرق الي مش مناسبة…
يعني مثلا لو عاوز تشوف اعلانات وتكسب فلوس انسي!!!
لو عاوز تجاوب علي استبيانات وتجيب فلوس فده ممكن لو في دولة اجنبية او دول الخليج.
لكن مش ممكن في بلاد زي مصر والمغرب والجزائر.
وعلشان كدا لو فكرنا هنلاقي قدامنا 3 طرق ملهمش رابع وهما:
- انك تشتغل فريلانسر ( بمعني اصح تقدم خدمات لناس محتاجة )
- تبني البيزنس بتاعك ( اياً كان هو ايه ).
- انك تبدأ تستثمر فلوسك ( في التداول بمختلف طرقه )
كدا انت عارف قدامك كام طريق ممكن تشتغل عليه….
تعالي بقي نشوف كل طريق ايه احسن طرق فرعية جواه ممكن توصلنا لاننا نعمل فلوس كفاية من الانترنت.
حابب حاجة بسيطة؟ اقرأ: افضل تطبيقات ربح المال في مصر
الجزء الاول: ازاي تكسب فلوس من النت كفريلانسر؟
الفريلانسر هو الشخصي البيقدم خدمات اون لاين وده قولناه من شوية.
لكن المقولناهوش لسه ان الفريلانس او العمل الحر هو الطريقة الانسب لينا كبداية في مصر.
ليه؟
علشان في الغالب بنبقي محتاجين رأس مال، وكمان مناسبة لاي شخص بيبدأ اون لاين ومحتاج انه يشتغل بجد حتي لو هيقعد فترة يتعلم، لكن هيبقي واثق انه عنده الدخل الكافي في المستقبل.
تقدر تقدم اي حاجة بتعرف تعملها كخدمة تبعها وتساعد بيها المحتاج ده.
لكن طبعا انا هنا هتكلم عن اكتر الخدمات المطلوبة علشان لو مبتدئ لسه هيتعلم.
اهم الخدمات المطلوبة علي مواقع العمل الحر هي:
- كتابة محتوي المواقع
- مونتاج فيديوهات يوتيوب
- تصميم فيديوهات يوتيوب ( الموشن جرافيك – الوايت بورد ).
- دراسات الجدوي للمشاريع.
- حل مشاكل وردبريس.
- اعلانات المواقع ( لكن هنا اكيد هتحتاج يبقي عندك موقع قوي ).
- تصميم صفحات الهبوط
- التعليق الصوتي
- الترجمة من العربية للانجليزية والعكس
- تصميم ( الشعارات – ديكورات )
- ادخال البيانات ( تدخل ارقام علي اكسيل – تكتب نصوص علي الورد – الخ )
بعد معرفت دلوقتي ايه الخدمات المطلوبة جدا علي المنصات المختلفة المفروض بقي نعرف هنقدمهم فين؟
احسن مواقع تشتغل عليها فريلانسر:
- موقع fiverr ( هو الاكتر من حيث الطلبات لكن هيحتاج منك خبرة شويتين في الانجليزي ).
- خمسات ( منصة عربية وهي الاشهر تقريبا في تقديم الخدمات المصغرة ).
- تقدر كمان تشوف مواقع التوظيف زي Wuzzuf وهتلاقي شغل لكن هنا هتشتغل من مقر شركة وهتقدم مهاراتك برضو بس بمرتب.
- مستقل ( هنا اصحاب المشاريع بيطلبوا العاوزينه وانت تعرض خدماتك وهما يقبلوا او يرفضوا الشخص )
طيب هتستلم فلوسك ازاي؟
اغلب منصات الفري لانس في الغالب بتدفع عن طريق بايبال، علشان كدا لازم تعمل حساب عليه.
متقلقش!!! paypal بنك الكتروني موثوق.
في الغالب كمان المنصة هتدفعلك بعد تسليم الخدمة بـ 14 يوم علشان تضمن مفيش اي مشاكل في الخدمة.
ودلوقتي خلينا نجاوب علي السؤال التاني هنا وهو….
الجزء التاني: ازاي تكسب فلوس من النت كصاحب بيزنس؟
فيه حالة قررت بدء البيزنس الخاص بيك، فالدخل هنا هيكون ضخم.
وهي دي الطريقة الاولي التقدر من خلالها تبقي غني من الانترنت.
لكن….
مع ذلك بشوف بدء البيزنس الخاص بيك هو التطور الطبيعي لتقديم خدمات الفريلانس الذكرتهالك فوق.
فمثلا:
- لو بتكتب مقالات كويسة تقدر تبدأ مدونة خاصة بيك ( زي ال انت بتقرأ فيها الموضوع دلوقتي ).
- انت شاطر في تصميم ومونتاج الفيديوهات، تقدر تبدأ قناة يوتيوب.
- وغيرها…
مجالات البيزنس التقدر تبدأها اون لاين وتجيب منها فلوس ضخمة كتييرة جدا.
لكن اشهر شغل ممكن تبدأ وتعمله وهتكسب منه فلوس زي مكسب اغلب المصريين هو :
- التدوين ( تقدر تعرف ازاي تبدأ مدونة بالتفصيل وتكسب منها )
- اليوتيوب ( عدد ضخم من اصحاب قنوات اليوتيوب مصريين وارباحهم اغلي من 500 دولار شهريا ).
- تسويق منتجات بالعمولة ( من خلال صفحات واعلانات ممولة ).
- تكبير حسابات انستجرام وتيك توك وبيعها.
- انشاء مواقع خاصة مثل ( مواقع الافلام – مواقع التوظيف – وغيرها ).
- بيع الكورسات ( من مجالات البيزنس المميزة جدا خاصة اذا كنت تمتلك جمهور ومعلومات كافية في احد المجالات ).
- انشاء منتج برمجي وبيعه ( لعبة – قالب وردبريس – اضافة وردبريس – صفحة هبوط – الخ ).
كل النشاطات الموجودة فوق دي مربحة جدا…
ارباح المدونات ممتازة بعض المواقع بتعكسب اكتر من 1000 دولار شهريا، اما اليوتيوبرز فأحنا عندرنا دراسة بتوضح متوسط ارباح اليوتيوبرز في كل مجال من كل 1000 مشاهدة.
علشان كدا متقلق، كل المطلوب منك ان تبدأ وتختار المجال الانسب ليك والي عندك الخبرة الكافية فيه انك تقدر تطوره في المستقبل.
ودلوقتي هنجاوب عن السؤال التالت والاخير وهو….
الجزء الثالث: ازاي تكسب فلوس من النت عن طريق التداول؟
التداول هو اخطر طريقة ممكن تكسب بيها فلوس من النت، بس برضو اكتر طريقة ممكن تدخل منها فلوس.
علشان كدا لو قررت انك هتبدأ من هنا فبجانب انك محتاج علي الاقل 1000 دولار علشان تتداول صح وغلط وتخسر وتكسب علشان تتعلم…
فأنت كمان محتاج تتعلم بشكل مكثف جدا وتقدر تحلل اي استثمار قررت تبدأ فيه.
فيه 4 طرق للتداول تقدر تشتغل عليهم وهما:
- تداول الفوركس
- تداول الاسهم
- الخيارات الثنائية.
- العملات الرقمية ( مجرمة في مصر )
كل نوع من الانواع الموجودة فوق دي علي الرغم من انه مربح جدا لكنه خطير جدا وممكن تخسر رأس مالك بالكامل فيه.
ودلوقتي تعالي اعرفك بسرعة عل كل نوع فيهم:
الفوركس
هو سوق تداول العملات الاجنبية، وهنا تقدر تتداول دولار مع يورو او مع جنيه استرليني او اي عملتين سوا ( المميز هنا هي الرافعة المالية البتقدمها ليك شركة التداول والبتضرب مبلغ صفقتك في 300 او 500 او 1000 حسب قيمة الرافعة ).
دليل الفوركس للمبتدئين الكتبته يعتبر بداية ممتازة تقدر تستعين بيها
الاسهم
هي عبارة عن حصص ملكية في شركات، وهنا تقدر تشتري اسهم سواء في بلدك او اسهم امريكية او غيره، بدون حاجة لوسيط بعد ظهور منصات التداول علي الانترنت.
الخيارات الثنائية
تشبه الفوركس جدا جدا ولكن هنا الوضع اكتر خطورة لان مدة الصفقة هنا هتبقي 60 ثانية ولغاية 15 دقيقة احيانا، كل ال عليك انك تتوقع السعر هيطلع ولا هينزل.
لو كان توقعك:
- صح: هتكسب 60 – 96 % من مبلغ الصفقة + رأس المال
- غلط: هتخسر مبلغ الصفقة بالكامل.
علشان كدا هنا الوضع اكتر خطورة لكنه اكتر في الربح، وده اتكلمت عنه بالتفصيل في دليل شركات الخيارات الثنائية.
العملات الرقمية
العملات الرقمية او المشفرة اعتقد ان كتيير ميعرفش عنها، وبما انها مش قانونية في مصر وعليها عقوبة اعتقد انه احسن انك متعرفهاش اساسا.
كل العاوزك تعرفه انها عملات موجودة علي الانترنت بس مينفعش امسكها فايدي.
وان اسعارها متذبذبة جدا، علشان كدا بيكسبوا منها.
دي اشهر 4 طرق للتداول ودي في الغالب الطرق البيكسب منها اي شخص بيتداول.
ممكن أجيب فلوس كام وفي مدة قد ايه؟
في الغالب في اي طريقة من الطرق التلاته الفوق هتحتاج 3 – 6 شهور علشان تتعلم الطريقة.
في الفترة دي انت محتاج تبدأ كمان وتقدم الشغل بتاعك.
سواء علي:
- المنصات المختلفة
- علي مشروعك الخاص
- او التداول.
فمثلا هتحتاج ترفع خدمتك علي منصة العمل الحر، وتبدأ في مشروعك الخاص حتي لو هتجهز الخطة الخاصة بيه بس، ولو هتتداول تقدر تبدأ بحساب تجريبي وهمي وتتعلم.
طيب تقدر تكسب كام؟
كل طريقة مختلفة عن التانية.
وكل طريقة جوه الطريقة مختلفة عن الطريقة التانية!!!؟
يعني ايه؟
- يعني لو بتقدم خدمة كتابة مقالات السعر هيختلف عن خدمة برمجة.
- ولو عامل مدونة هتختلف في الدخل عن لو بدأت قناة يوتيوب.
- ولو بدأت تداول اسهم، الارباح او الخسائر هتبقي غير لو اشتغلت علي الفوركس.
فهمت؟
لكن بشكل عام كل الطرق دي بتعتمد علي مجهودك وتقدر تعمل 0 دولار شهريا لغاية 10 الاف دولار واكتر.
انت وهدفك الحطيته لنفسك وبتعافر علشان توصله.
ايه اكتر طريقة اقدر اكسب منها فلوس؟
اكتر طريقة بتعمل منها فلوس هي الطريقة البتستغل فيها شغفك.
مش دايما الشغف ينفع نمشي وراه.
لكن لو شغفك ينفع يتحول لمهارة بتجيب دخل وفلوس فدي الطريقة الوحيدة علشان تحقق كل ال انت بتحلم بيه.
علشان كدا محتاج تسأل نفسك سؤالين:
- هو انا عندي شغف اصلا بايه؟
- طيب ينفع احول الشغف العندي ده لفلوس؟
لو اجابتك علي السؤالين دول واضحة تقدر بشكل واضح تحولها لفلوس وفلوس ضخمة.
هل لازم ادفع فلوس علشان اعمل فلوس من النت؟
ده اكيد علي حسب الطريقة ال اخترها علشان تبدأ بيها.
لكن خليني اقولهالك بصراحة…
لو عاوز تنجح فعلا علي النت وتجيب منه فلوس فأكيد محتاج تصرف وتدفع.
لان البيزنس الخاص بيك في النهاية هو الطريقة الوحيدة لانك تستمر وتكمل وتجيب دخل مناسب.
بدايتك ممكن تكون من غير فلوس عن طريق تقديم مهاراتك، لكن في فترة اياً كانت امتي هتضطر انك تستثمر شوية فلوس علشان تجيب فلوس.
وخليك دايما فاكر ان:
الفلوس بتجيب فلوس
دي كانت نهاية موضوعنا واتمني تكون عرفت ازاي تكسب فلوس من النت.
لو فيه اي سؤال محتاج تعرف اجابته فانا منتظرك في التعليقات.
بالتوفيق.
عن الكاتب
لقد احببت المقال كما انه فادني كثيرا
مبسوطين ان الموضوع عجبك ينور ونتمني كل المواضيع الجديدة تعجبك وتكون مفيدة